വേദനിക്കുന്ന നെഞ്ചില്‍ കിളിര്‍ത്തൊരു
വേരുറപ്പുള്ള പാഴ്മരമാണു ഞാന്‍
വേനല്‍ വന്നുഗ്രതാപമേകീടിലും
ഉറവ വറ്റാത്ത കണ്ണുനീരാണു ഞാന്‍
ദുഃഖചിന്തകളുള്ളില്‍ പരസ്പരം
പകിടപന്ത്രണ്ടുരുട്ടിക്കളിക്കവേ
പകുതിയായൊരെന്നായുസ്സിനൊപ്പമെന്‍
ശിഖരകമ്പനം ശിഥിലമായീടവേ
വികൃതജീവിത കഷ്ടകാണ്ഡങ്ങള്‍ തന്‍
സ്മൃതികള്‍ വീണ്ടും വികൃതി കാണിക്കവേ
വിജനമജ്ഞാതമാമീ തുരുത്തില്‍ ഞാന്‍
പൂവിടാന്‍ കാത്തു കാത്തു നില്‍ക്കുന്നിതാ
അരുതരുതെന്‍ കടയ്ക്കല്‍ പതിക്കുവാന്‍
പരശു തീര്‍ക്കുന്ന ദുഷ്ടവ്യാപാരമേ
പകരമെന്തിനി നല്‍കണം, ജീവനായ്
ഗുണമിയലാത്തൊരെന്റെ പാഴ്ദേഹമോ???
സഫലമാവാത്തൊരെന്റെ സ്വപ്നങ്ങളോ?
ഇടയിലോര്‍മ്മതന്‍ ദീര്‍ഘനിശ്വാസമോ?
പലര്‍ പറിച്ചൊരെന്നാത്മപുഷ്പങ്ങളോ?
ഇനിയുമറിയാത്ത താതവാത്സല്യമോ?
വിജന വീഥിയിലാര്‍ നട്ടു പണ്ടെന്നെ?
പകലില്‍ വാടാതെ നീര്‍ തന്നതമ്മയോ?
പക ജ്വലിക്കുന്ന ലോകസഞ്ചാരത്തില്‍
തണലു തേടിയിങ്ങെത്രപേര്‍ വന്നു പോയ്...?
പകരമൊന്നും കൊതിക്കാതെയെത്രയോ
പകലുകള്‍ക്കുഷ്ണശാന്തി പകര്‍ന്നു ഞാന്‍
ഇരവിലെത്രയോ നഷ്ടസ്വപ്നങ്ങളാം
കിളികള്‍വന്നെന്നിലഭയം തിരഞ്ഞു പോയ്
ഇനിയുമാശതന്‍ പൂഞ്ചില്ല വീശിയീ
പുലരികള്‍ക്കഭിവാദനമേകുവാന്‍
പുതുജനങ്ങള്‍ക്കു തണല്‍ വിരിച്ചീടുവാന്‍
തരിക വിധിയേ... എനിക്കുമീ ജീവിതം...
© ജയകൃഷ്ണന്‍ കാവാലം
Monday, January 31, 2011
Subscribe to:
Post Comments (Atom)
Posts
11 comments:
മനോഹരമീ കവിത…
നന്നായി ..
നല്ല വരികൾ.
പകുതിയായുസ്സല്ലേ കഴിഞ്ഞുള്ളൂ?
ഇനി ഒരു പകുതി മുഴുവൻ ബാക്കി കിടക്കുന്നു.
പൂക്കാലങ്ങളെത്ര ബാക്കി കിടക്കുന്നു!?
ശാന്തനാവുക!
കെട്ടടങ്ങാത്ത ആവേശം..
അവനെ മുറിച്ചു മാറ്റാതിരുന്നെങ്കില്‍... :(
എന്നത്തെയും പോലെ വീണ്ടും ഒരു നല്ല സൃഷ്ടി....അറിയാതെ ഏറ്റുപാടിപ്പോകുന്നു.....
ഇനിയുമാശതന്‍ പൂഞ്ചില്ല വീശിയീ
പുലരികള്‍ക്കഭിവാദനമേകുവാന്‍..
പുത്തുലഞ്ഞു തന്നെ നില്‍ക്കുന്നുണ്ട്
കവിതയുടെ ഒരു പൂമരം..!
ഇനിയുമാശതൻ പൂഞ്ചില്ല വീശിയീ
കവിത തെന്നലായി തലോടുന്നെന്നെയും
നല്ല കവിത......
വരികള്‍ മനോഹരം!
നല്ല വരികള്‍.. നല്ല താളബോധം..... പഴയതെങ്കിലും പ്രയോഗിക്കുന്ന ആഖ്യാനത്തില്‍ നല്ല കൈത്തഴക്കം...
(താങ്കളുടെ പ്രൊഫൈല്‍ ഫോട്ടൊ മാറ്റിയല്ലേ.... നന്നായി... )
nannayittund mashe..
Post a Comment